கரம் விரிப்போமா.....

கரம் விரிப்போமா.....

பொக்கை வாய் சிரிப்போடு கரம் விரித்தீரே
தலை வணங்கி மண்டியிட்டு பிறரிடம் தலை வணங்கா கழுத்தினராய் ஆனோமே

சிறு வயதில் ஞானத்தோடு கரம் விரித்தீரே
ஞானம் பெற்றாலும்
நியாயமின்றி நடக்கிறோமே

தந்தைக்கு உறுதுணையாய்
கரம் விரித்தீரே
உற்றவர் கதறினும்
உதவாமல் போனோமே

மலைப்பொழிவில் எங்களை நோக்கி கரம் விரித்தீரே
அறிவுரை கேட்டாலும்
அறிவின்றி நடக்கிறோமே

சிறுவர்களை வரச்சொல்லி
கரம் விரித்தீரே
சிறார் தமக்கு நற்போதனை சொல்ல மறந்தோமே

ஏழையரை கண்டு வருந்தி
கரம் விரித்தீரே
வசனங்களை தினமும் படித்தாலும்
வறியவரை வெறுத்தோமே

பாவிகளை கண்ணுற்று கலங்கி
கரம் விரித்தீரே
சகோதரர்களின் தவறுகளை மன்னியாமல்  வருத்துகிறோமே

எமக்காக சிலுவையில் தொங்கி
கரம் விரித்தீரே
கண்ணீர் குளமாக அழுதும்
பாவச் சேற்றில் வீழ்ந்தோமே

இறுதியில் விண்ணுக்கு செல்கையில் கரம் விரித்தீரே
விண்ணை நோக்கி பார்த்துவிட்டு மண்ணில் மனம் போல வாழ்கிறோமே

என்று உம்மைப் போல நல்லவற்றுக்காய் கரம் விரிப்போம்?
என்று உம்மைப் போல ஏழைகளுக்காய் கரம் விரிப்போம்?

இறைவா திருவருகைக்காலத்தில் இதோ வருகிறோம்.

இன்றே புறப்படுகிறோம் கரம் விரிக்க.......

அன்புடன்
கஸ்மீர் ரோச்
சின்னமலை
9382709007